Gweledigaeth​​​​​​​

Ysbrydoli – Cefnogi – Llwyddo

Ein nod fel ysgol yw darparu’r safonau addysgu a’r cefnogaeth gorau posibl i bob disgybl o fewn amgylchedd lle bo gan bawb gyfleoedd niferus i gyflawni a rhagori ar eu potensial.

Mae ein cymuned a’n cynefin yma yn ysgol Gwaelod y Garth yn darparu amrediad o gyfleoedd cyfoethog sydd yn ysbrydoli ein disgyblion i fod yn ddysgwyr uchelgeisiol ac ymchwilgar. Mae’r ardal wledig, y goedwig a’r mynydd yn rhoi profiadau awyr agored buddiol ac yn annog annibyniaeth a chwilfrydedd. Mae’r gymuned yn rhan annatod o’n cynefin ac rydym yn cydweithio ag aelodau’r gymuned i adeiladu ar yr ymdeimlad o berthyn sy’n nodweddiadol i ni. Mae’r cyd-berthynas weithredol yma yn ganolog i fywyd ysgol Gwaelod y Garth wrth i botensial pob disgybl gael ei feithrin yn yr ysgol, yn y gymuned a thu hwnt.

Mae dwyieithrwydd yn cael ei ddathlu yn ein hysgol a’r cydweithio naturiol rhwng y ddwy ffrwd yn ein galluogi i feithrin disgyblion hyderus sy’n ymfalchïo yn eu hiaith a’u diwylliant. Bydd pob disgybl yn cael eu herio ac mae disgwyliadau uchel yn rhan annatod o’n hysgol. Bydd pob disgybl yn derbyn pob cefnogaeth posib er mwyn llwyddo ac ymfalchïwn yn yr ethos cefnogol, cynhwysol sydd yn ein hysgol. Caiff pob disgybl eu hannog i fod y gorau y gallant fod.

Yn sgil ein pwyllgorau Llais, rydym yn annog pob disgybl i gyfrannu at fywyd ein hysgol ac i wneud penderfyniadau strategol. Cant eu hannog i wneud dewisiadau fydd yn cael effaith gadarnhaol ar eu hysgol, eu cymuned, eu gwlad a’r byd ehangach. Gwerthfawrogwn natur aml ddiwylliannol ein hardal a’r brif ddinas, gan annog disgyblion parchus a gofalgar sy’n dathlu eu gwahaniaethau. Yn Ysgol Gwaelod y Garth rydym yn ymfalchïo yn ein hunaniaeth a’n Cymreictod ac mae ein cwricwlwm yn dathlu ein hieithoedd, ein hanesion, ein diwylliant a’n cynefin.